ശാലീനം

   ‍‍ദൈവത്തിന്റെ നാട്ടിലും ദൈവത്തെ അറിയാത്തവർ!

അല്ലാഹു, സ്രഷ്ടാവ്, ദൈവം, പടച്ചതമ്പുരാന്‍, ഈശ്വരന്‍, സര്‍വ്വേശ്വരന്‍, ജഗതീശ്വരന്‍, ജഗന്നിയന്താവ്... അങ്ങനെയങ്ങനെ.. പലരും പല പേരിലും വിളിക്കുന്നു. വിശ്വസിക്കുന്നു.. വിശ്വാസത്തിന്റെ ആഴം പലരിരും പലതായിരിക്കാം. ആയിരിക്കാം എന്നതല്ല- ആണ് എന്നതാണ് ശരി. അതുകൊണ്ടാണല്ലോ ഇപ്പറഞ്ഞ പേരുകളൊക്കെ വിളിക്കുന്നവരില്‍ തന്നെ പല തരക്കാരെ കാണേണ്ടി വരുന്നത്. ചിലര്‍ക്ക് അല്ലാഹു അല്ലെങ്കില്‍, ഈശ്വരന്‍ എന്നുപറഞ്ഞാല്‍ പിന്നെ അതിന്റപ്പുറത്തേക്ക് മറ്റൊന്നുമില്ല. അതുകൊണ്ട് തന്നെ ഇക്കൂട്ടര്‍ ത്യാഗത്തിനു തയ്യാര്‍. സ്വന്തം ജീവിതത്തില്‍ പ്രയാസങ്ങളും ബുദ്ധിമുട്ടുകളും വിടാതെ പിന്തുടരുമ്പോഴും ഇതൊക്കെ ദൈവത്തിന്റെ പരീക്ഷണം എന്നു തിരിച്ചറിഞ്ഞ് ശാന്തമായി ജീവിക്കുന്നു. എന്നു മാത്രമല്ല മറ്റുള്ളവരില്‍ പ്രയാസങ്ങളും ബുദ്ധിമുട്ടുകളും കാണുമ്പോഴാകട്ടെ അവര്‍ക്കൊരു കൈത്താങ്ങായി നിലകൊള്ളാന്‍ ഇവര്‍ ഒരുക്കവുമാണ്

എന്നാല്‍ ചിലര്‍ക്കോ!.. പ്രയാസങ്ങള്‍, ബുദ്ധിമുട്ടുകള്‍, ക്ലേശം ‍എന്നൊക്കെ പറഞ്ഞാല്‍ ചിന്തിക്കാനേ പറ്റുന്നില്ല. അതുകൊണ്ടുതന്നെ സ്വന്തം ജീവിതത്തെ കൊഴുപ്പിക്കുന്ന വഴിയില്‍ ദൈവപ്രീതി എന്ന ഒരു സംഗതിയെ കുറിച്ച് ഇവര്‍ ചിന്തിക്കാറില്ല. ദൈവവിലക്കുകള്‍ ഇവര്‍ക്കൊരു തടസ്സമാകാറുമില്ല. അതിനാൽ മറ്റുള്ളവരെ പറ്റിക്കല്‍, കളവ്, ചതി, വഞ്ചന, കൊല, കൊള്ളലാഭം എന്നിത്യാതി കാര്യങ്ങളൊക്കെ ഇവരുടെ നിഘണ്ടുക്കളില്‍ വെറും കുസൃതികള്‍ മാത്രം.അല്ലെങ്കില്‍ ദൈവത്തിനു കരം കൊടുത്ത് പ്രസാദിപ്പിച്ചാല്‍ മായ്ച്ചു കളയാവുന്ന കൊച്ചു കൊച്ചു തെറ്റുകള്‍ മാത്രം.

കൊലയും കൊള്ളയുമൊന്നും തൊഴിലായി സ്വീകരിച്ചില്ലെങ്കിലും ജീവിതമെന്നത് വെറും ചായം  തേച്ചും, ലിപ്സ്ടിക്കിട്ടും പാടിയാടിത്തിമര്‍ക്കാന്‍ മാത്രമുള്ളതാണെന്ന് ധരിച്ചു വെച്ചവരുമുണ്ട്. ഉടുത്ത നഗ്നരായി വേദി നിറഞ്ഞാടി അവസാനം കാണികളുടെ കയ്യടി ഏറ്റുവാങ്ങുമ്പോള്‍ ആനന്ദാശ്രുക്കള്‍ പൊഴിച്ചുകൊണ്ട് 'ഇതിന് ആദ്യമായി ഞാന്‍ ദൈവത്തിനോട് നന്ദി പറയുന്നു' എന്ന് നാണമില്ലാതെ തട്ടിവിടുന്ന അഭിനവ ഭക്തരും ഈ ആധുനിക ലോകത്തിന്റെ പുതിയ സംഭാവനയാണ്. ഇവിടെ ഒരു തമാശ കൂടിയുണ്ട്. ജീവിതത്തിന്റെ ഈ ചായംപൂശിക്കളിയില്‍ ദൈവത്തിന്റെ സഹായം കാണുന്ന ഇക്കൂട്ടര്‍ക്കു പക്ഷെ എവിടെയെങ്കിലുംവെച്ച് നിറം മങ്ങിയ പേക്കോലങ്ങളെയോ, പ്രയാസങ്ങളനുഭവിക്കുന്ന രോഗികളെയോ കാണേണ്ടി വന്നാല്‍ ഇവരുടെ ഭാഷയില്‍ അതൊക്കെ ദൈവത്തിന്റെ ചില ക്രൂര വിനോദങ്ങളാണ്. എന്നിട്ടോ..!?. ‌ ക്രൂരതയില്ലാത്ത വിനോദം എന്താണെന്നുകൂടി അറിയണമല്ലോ. റോസ്പൌഡറും,മേയ്ക്കപ്പും മേലൊട്ടാകെ വാരിത്തേച്ച്‌ കാണാന്‍ മൊഞ്ചില്ലാത്ത പാവം മന്ദബുദ്ധികള്‍ താമസിക്കുന്നിടത്ത്‌ പോയി അവരുടെ മുന്നില്‍ ആടിപ്പാടി ഷൈന്‍ ചെയ്യുന്നതാണ് ക്രൂരതയില്ലാത്ത വിനോദം!. ഇതാണത്രേ കാരുണ്യ പ്രവര്‍ത്തനം!. ഇവിടെയാണ് ഒരു സത്യം മുഴച്ചു നില്‍ക്കുന്നത്. ഇവര്‍ ദൈവത്തില്‍ ആരോപിച്ച  'ക്രൂരവിനോദം' കാണേണ്ടത് യഥാര്‍ത്ഥത്തില്‍ ദൈവത്തിലോ അതോ..??!.. 

ഒരു പാട് ഉത്തരവാദിത്വങ്ങള്‍ ഏറ്റെടുത്തു ചെയ്തു തീര്‍ക്കേണ്ട ഒരു ചെറു കാലയളവാണ് ഈ ജീവിതം എന്ന യാഥാര്‍ത്ഥ്യം വിസ്മരിച്ചുകൊണ്ട് ജീവിതത്തെ വെറും കളിയും വിനോദവുമായി ചിത്രീകരിച്ചു യുവതലമുറയെ തെറ്റായ ദിശയിലേക്ക് തിരിച്ചു വിടുന്നതിൽ ടിവി ചാനലുകള്‍ മത്സരിച്ചുകൊണ്ടിരിക്കുന്ന ഒരു കാലഘട്ടമാണിത്. റേറ്റിംഗ് കൂട്ടുക എന്ന ലക്ഷ്യം മാത്രം മുൻനിറുത്തി എന്തു ആഭാസ പരിപാടികളും ആസൂത്രണം ചെയ്യാൻ അവർക്ക് ഒരു മടിയുമില്ലാതായിരിക്കുന്നു.
 

ചേറില്‍ കിടന്നുരുണ്ട്, രാപ്പകലുകള്‍ ഭേദമില്ലാതെ-നാടെന്നോ കാടെന്നോ നോക്കാതെ ആളൊഴിഞ്ഞയിടങ്ങളില്‍ ചെറു ടെന്റുകള്‍ കെട്ടി ചോറും കൂട്ടാനും വെച്ചുകളിച്ച് അര്‍മാദിച്ചു നടക്കുന്ന ഒരു പറ്റം സിറ്റി ഗേളുകളെയോ, അവരുടെ പിന്നാലെ മണംപിടിച്ച്‌ മൂക്കുവിടര്‍ത്തി നടക്കുന്ന സിറ്റി ബോയ്മാരെയോ അല്ല ഈ സമൂഹത്തിനാവശ്യം. നാണവും മാനവും എന്തെന്ന് തിരിച്ചറിയുന്ന- ആത്മാഭിമാനമുള്ള- സമൂഹത്തോട് പ്രതിപത്തിയും പ്രതിബദ്ധതയുമുള്ള ഒരു നല്ല തലമുറയെയാണ് ഇവിടെ ആവശ്യം. അത്തരം യുവതീ യുവാക്കള്‍ക്കു മാത്രമേ ഉന്നത നിലവാരമുള്ള കുടുംബത്തിന്റെ അടിത്തറ പാകാന്‍ സാധിക്കുകയുള്ളൂ. പക്ഷെ, എങ്ങനെയെങ്കിലും തങ്ങളുടെ മക്കളെ നാലാളറിയട്ടെ എന്നുകരുതി തടിമിടുക്കുള്ള ആണ്‍കുട്ടികളോടൊത്ത് ഇത്തരം വികൃതസുന്ദരികളെ അഴിഞ്ഞാടാന്‍ വിടുന്ന നവ കൊച്ചന്മമാര്‍ക്ക് ഇത് മനസ്സിലായിക്കൊള്ളണമെന്നില്ല.
 

'വെറുതെ അല്ല ഭാര്യ' എന്ന് തലക്കെട്ട്  നല്‍കി സ്വന്തം സഹധര്‍മ്മിണിയെ കണ്മുന്‍പിലിരുത്തി തത്വത്തില്‍ 'വെറുതെ ഒരു ഭാര്യ'എന്നാക്കി മാറ്റി അവതാരകയെ കണ്ണടച്ച് കെട്ടിപ്പുണര്‍ന്നു നില്‍ക്കുന്ന  "ശ്വേതാവികാരത്തെ" ഈ സമൂഹം തങ്ങളുടെ  ഉന്നത സംസ്കാരമായി തെരെഞ്ഞെടുത്താലുള്ള ദുര്‍ഗ്ഗതിയും  ഒന്നാലോചിച്ചു നോക്കൂ!?.

ഇത്തരം ചീഞ്ഞ പ്രോഗ്രാമുകള്‍ സമൂഹത്തിനുമേല്‍ അടിച്ചേല്‍പ്പിക്കുന്ന ചാനലുകാരോടും, ആവശ്യത്തിനും അനാവശ്യത്തിനും ഒരുപോലെ ദൈവത്തെ കൂട്ടുപിടിക്കുന്ന കപടവിശ്വാസികളോടും ഒന്നേ പറയാനുള്ളൂ.. നിങ്ങള്‍ മനുഷ്യസമൂഹത്തെ ഒന്നടങ്കം നശിപ്പിക്കുന്ന ഇത്തിക്കണ്ണികളാകരുത്. നിങ്ങള്‍ക്ക് നേട്ടമാകാം. പക്ഷെ അത് ഈ സമൂഹത്തിനു കോട്ടമേല്‍പ്പിച്ചുകൊണ്ടാകരുത്.

===============  *******  ===============

മറ്റു ലേഖനങ്ങള്‍ക്ക് ഇവിടെ ക്ലിക്ക് ചെയ്യുക